رەشبینی وەك چەكێكی دەستی دوژمنان بۆ كوشتنی هیوای مرۆڤی مسوڵمان

01/16/2017 18:31:44




دوژمنان چاویان لەم ئوممەتە بڕیوە، بۆ ئەوەی سەروەت و سامانیان بەتاڵان بەرن، لەم رێگەیەوە خۆشگوزەرانی بۆ خۆیان دابین بكەن و ئەم گەلانەش بخەنە دۆخی هەژاری و نەداری و دواكەوتویی، ئەمەش سیاسەتی لیبراڵە نوێیەكانە بەرامبەر گەلە نا رۆژئاواییەكان، لەبواری سیاسیشەوە هەوڵ دەدەن ئەم گەلانە رەش بین بكەن، كە ئەمەش جەنگێكە كاریگەریەكانی زۆر لەچەكە كۆكوژەكان زۆرترە، چونكە هەركاتێك رەشبینی زاڵ بێت بەسەر گەلێكدا، ئەو گەلە هەرەس دەهێنێت و هێزو تواناو ئیرادە لەدەست دەدات خوای گەورە مەسەلەی رەشبینی پەیوەست دەكاتەوە بەعەقیدەوە، رەشبینی بەسیفەتی گومڕاو درۆزن و دوڕو و شكست خواردوەكان لەقەڵەم دەدات، لەدیدی كۆمەڵگەشەوە كەسانێكن كە بەشوێن بەرژەوەندی و قازانجی تایبەتیەوەن، لەوانەیە یەكێك بپرسێت چۆن لەمە رزگارمان دەبێت؟ دەرچون لەم قەیرانە روونە، ئەویش گەرانەوەیە بۆ لای خوای گەورەو پشت بەستنە پێی.
خۆبەستنەوە بە (عروە الوپقی) كەبەرزبونەوەیە بۆ ئاسمان هیواو خۆشی لەدڵدا دەڕوێنێت، خوای گەورە لەقورئاندا زۆر چیرۆكمان بۆ دەگێڕێتەوە لەو چیرۆكانەوە دەتوانین هیوا وەربگرین، زیاتر دڵخۆش بین بەپشتیوانیەكانی خوای گەورەو زیاتر بڕوا بەسەركەوتنی باوەڕداران بهێنین كەخوایان لەگەڵدایە( خوای گەورە دەفەرموێـت: { الم * غُلِبَتِ الرُّومُ * فِی أَدْنَی الْأَرْچِ ۆهُم مِّن بَعْدِ غَڵبِهِمْ سَێغْلِبُونَ * فِی بِچْعِ سِنِینَ لِلَّهِ الْأَمْرُ مِن قَبْلُ ۆمِن بَعْدُ ۆێوْمَئِژٍ ێفْرَحُ الْمُۆْمِنُونَ * بِنَصْڕ اللَّهِ ێنصُرُ مَن ێشَا‌وُ ۆهُۆ الْعَزِیزُ الرَّحِیمُ } مێژوو بەتەنیا شایەتە، پێغەمبەری خوا بەتەنها وەستایەوە بەرامبەر بەستەمكارانی قوڕەیش و بتەكانیان، بەتەنیا توانی هیواو و ئاوات لەدڵی یاراندا بچێنێت، لەشەڕی (ئەحزاب) دا لەكاتێكدا كە دوژمن لەهەموو لایەكەوە دەوریان دابوو، خۆی كاری دەكرد لەگەڵیاندا، خەندەقی لێ دەدا، لەو كاتە ناهەموارەدا مژدەی پێدان بە رزگار كردنی یەمەن و شام و عێراق و رۆژهەڵات هەمووی.
هەروەها صلاح الدین لەكاتێكدا كۆتایی بە دەوڵەتی فاتمیە هێنا لەمیسرو رۆژئاوای ئیسلامی و لەرۆژهەڵاتیشەوە دەوڵەتی بوەیهی لەناوبرد، پاشان رووی كردە (قودس) بۆ شەڕی خاج پەرستەكان بەم شێوەیە توانی قودسیش رزگار بكات.
تەنها هۆكارێك بۆ ئەم سەركەوتنانە بوونی ئیرادەو هیواو ئاوات و پلان بوو بۆ ئایندە ، یەكێتیەكی باشیان بنیاتنا، زاڵ بوون بەسەر دووبەرەكی و ناكۆكی و پشتیان بەخوا بەست، خواش سەری خستن، چونكە ئەگەر ئێمە دڵەكانمان بەپاكی روو لەخوا بكەین و هۆكارەكان بەباشی ئامادە بكەین سەردەكەوین، دەبێت متانەمان بەخوا هەبێت كە هیچ شتێك لە دەرەوەی دەسەڵاتی ئەودا نیە لەئاسمان و زەوید : { ۆاللَّهُ غَالِبٌ عَڵیٰ أَمْڕهِ ۆڵٰكِنَّ أَكْپَرَ النَّاسِ ڵا ێعْڵمُونَ } بەڵام دەبێت ئەو راستیەش بزانین كە ئەركەكان تەنها بە پشت بەستن بەخوا نایەتە دی بەڵكو لەگەڵ هیوادا دەبێت پلانی كاریش هەبێت، دەبێت توێژینەوە لەسەر رێگەكانی سەركەوتن بدۆزینەوە.
 لەسەر سەرخستنی راستی هەنگاو بنێیین و دەبێت توێژینەوە لەسەر هۆكارەكانی شكست بكەین، كە گرنگترینیان دووبەركی و جیاوازیە، چونكە ئێمە ئێستا جێگەی بەنوئیسرائیلمان گرتۆتەوە شتێك دەكەین كە نەعەقڵ و نە وەحی قبوڵی ناكات، ئوممەتەكەمان توشی نەخۆشی جۆراو جۆر بوە لەكاتی بەڵاو موسیبەتدا ناگەڕێینەوە بۆ لای خوا، ئیتر چۆن خوا سەرمان دەخات؟ چۆن بەڵێنەكان دێنە دی؟ گیانی هاوكاری لەناوماندا كەم بوەتەوە. ئینتیمامان بۆ نەتەوەو نیشتیمان لاواز بوە، خۆ بەكەمزانی هەمومانی كوشتوە، باری كۆمەڵایەتیمان بەرەو هەڵوەشانەوە دەچێت، پەیوەندی برایەتیمان نەماوە، كۆمەڵگە متمانەی بەخۆی نەماوە، رەشبینی سەرتاپای دەرونی داگیر كردوین.
دەبێت ئەم نەخۆشیانە تێپەڕێنین دەبێت جارێكی تر متمانە بگەڕێنینەوە بۆ ناو تاك و كۆمەڵگە، دەبێت بڕوامان بە مژدە و بەڵێنەكانی خوای گەورە هەبێت كە ئێمە سەردەكەوین، دەبێت ئەو چاویلكە رەشانەی لە چاوماندایە لایان بەرین لەجیاتی ئەوە دەبێت نورو رووناكی خوا ببینین ،بۆ ئەوەی باوەڕدار بەرچاو رۆشن بێت خەم و خەفەت داینەگرێت. دەبێت مێژوو بخوێنینەوە نەزان و نەخوێندەوار نەبین، یەكەم هەنگاوی چارەسەر ئەوەیە كە دەبێت دەست بەهۆكارە مادیەكانەوە بگرین بۆ چارەسەر، نابێت تورەو كەم ئارام بین، نابێت توندڕەو بین و بەناوی ئاینەوە تاوان ئەنجام بدەین، دەبێت باش لەئیسلام تێ بگەین و لەروانگەی ئامانجەكانەوە هەنگاو بنێین، دەبێت خوا باش بناسین و متمانەمان بەتواناكانمان هەبێت و زانیاریەكانی خوا بزانین كەبێ سنورە.
نابێت دڵی باوەڕدار رەش بین بێت ، دوژمنان دەتوانن بۆ ماوەیەك سەربكەون بەڵام دڵینا بن كە نوری خوا بە ئەوان ناكوژێتەوە .
هەر كاتێك ئەو دنیایە لەبەرچاومان بچوك كرایەوە دەگەڕێینەوە بۆ لای خوای گەورە. ئەویش بەهانامانەوە دێت و پلانەكانیان لەبار دەبات و دەبێتە مایەی لەناوچونی خۆیان ، تیرەكانیان روودەكەنە سنگی خۆیان و ئەو كاتە راپەرین لەدژیان دروست دەبێـت، دەبێت هەمومان متمانەمان بەخوا هەبێت ئەگەر شایەنی سەركەوتن بین، خوا بۆمان دەنێریت.
ئەو هۆكارانەشی كە دەبنە هۆی رەشبینی بریتین لە:
1- رەشبینی بەرامبەر بەلێخۆشبونی خوا.
2- رەشبینی بەرامبەر رۆیشتنی نەهامەتی و باری سەخت.
3- رەشبینی بەرامبەر گۆڕانكاری.
راستیەك هەیە دەبێت هەمومان بیزانین، ئەویش ئەوەیە لەو رۆژەوەی كەئادەم دروست بوە، ململانێی نێوان راستی و بەتاڵ هەر هەیە، پێكدادانی گەورەش لەنێوانیاندا روویداوە، هەندێك جار باتڵ سەركەوتوە، بەڵام دواجار سەركەوتنی كۆتایی هەر بۆ باوەڕدارانە. ئەمەش لەزۆر ئایەتی قورئان و فەرمودەی پێغەمبەردا جەختی لەسەر كراوەتەوە، باوەڕدار رەشبینی نازانێت، هەرچەند نارەحەتیەكان زۆر بن، یان تاوانەكان یان فشاری دەوروبەرەكان، باوەڕدار رۆژبەرۆژ باوەڕی بەبەڵێنەكانی خوا زیاتر دەبێـت، چونكە رەشبینی لەهەموو چەكێك كاریگەرترە، بەدرێژای مێژوو دوژمنان ویستویانە بەم چەكە ئوممەتی ئیسلامی لەناوبەرن .لەسەرەتای ئیسلامەوە هەر لەم رێگەیەوە ویستیان ئیسلام زیندەبەچاڵ بكەن، سیاسەتی جۆراو جۆریان گرتە بەر.
ئەگەر ئەو پەروەردە ئیمانیە گەورە نەبوایە كەلە رێگەی قورئان و خودی پێغەمبەرەوە پیادە دەكرا، كە باوەڕێكی گەورەی لەدڵی شوێنكەوتواندا چەسپاندو و هیوای سەركەوتنی لەدڵدا رواندن، ئەوا هەر زوو ئەو كاروانە كاروان كوژە دەكرا. بەڵام بەپێچەوانەوە ئەو كۆمەڵە بڕوادارە لاوازە بەئیمانی بەهێزەوە هاتنە مەیدان و توانیان لەكۆتایدا گەورەترین دوو ئیمپراتۆریەتی جیهانی ئەو كاتە بدەن بەزەویدا.
لەكۆندا خاج پەرستەكان و رۆژهەڵات ناسەكان لەئێستاشدا عەلمانی و دەسەڵاتدارە رۆژئاوایەكان دەیانەوێت ئەم رەشبینیە لەناو گەلانی مسوڵماندا بچێنن، دەیانەوێت دووبەرەكی و شەڕی تائیفی و مەزهەبی دروست بكەن بۆ ئەوەی هێزو توانایان نەهێڵن.
لەدوای روخانی دەوڵەتی عوسمانیشەوە ئەو هەوڵانە هەر بەردەوامن، دەیانەوێت ئیسلام لەژینگەیەكی جوگرافی بچوكدا قەتیس بدەن، با ئەو سنورە لەڤاتیكان گەورەتر بێت، دەیانەوێت ئیسلام تەنها لەسنوری عیبادەتەكاندا قەتیس بدەن، بەڵام گومان دروست بكەن بۆ ئەوەی گەپرۆگرامی ژیان نەبێت لەرووی سیاسی و ئابوری و كۆمەڵایەتی.
{ ێا أَیُّهَا الَّژِینَ ێ‌مَنُوا اسْتَجِیبُوا لِلَّهِ ۆلِلرَّسُولِ إِژَا دَعَاكُمْ لِمَا یُحْیِیكُمْ}، { قُلْ إِنَّ صَڵاتِی ۆنُسُكِی ۆمَحْێاێ ۆمَمَاتِی لِلَّهِ رَبِّ الْعَاڵمِینَ }. 
ئەوان نایانەوێت ئێمە ئازادو سەربەخۆ بین، سیادەمان لەژێر دەستی خۆماندابێت، ئەوان دەیانەوێت ئێمە خزمەتكاری ئەوان بین، سەروەت و سامانمان بەتاڵان بەرن بەسامانی مرۆیی و نیشتیمانیمان ، دەیانەوێت ژیانی باش بۆ خۆیان دابین بكەن، دێنە ناو وڵاتەكانمان و بەناوی گەشت و گوزار، باشترین ژینگەی ئارەزوو بازی و خۆشگوزەرانی بۆ خۆیان دابین دەكەن، نەوت و سەورەت و سامان بەتاڵان دەبەن، گەلەكانیشمان لەوپەڕی نەهامەتی و هەژاری و نەفامیدا دەژین، بەڵام دەبێت هەمومان ئەو راستیە بزانین كەرۆژێك دێت ئەم گەلانە لەخەو راپەدەرن و دەگەڕێنەوە سەر ئەو هیواو ئاواتە گەورانەی كە خوای گەورە وەك مژدەی سەركەوتن نیشانمان دەدات ،كەدواجار دەبێت راستی و عەدالەت و ئازادی سەركەوێت و دوژمنان و ستەمكاران و گەندەڵكاران شكست بخۆن و جارێكی تر سەروەری و سەربەرزی و سەربەخۆیی بكەوێـتەوە دەست ئەم گەلانە.

• ئەمینداری گشتی یەكێتی جیهانی زانایانی مسوڵمان.
• سەرۆكی رابیتەی ئیسلامی كورد.