رووداوەکانی فەرەنسا و دیدێك

11/20/2015 08:14:42

كوشتنی خەڵكی سڤیل و لاشەڕ و ئەوانەی پەیوەنییەکیان بە شەڕ و ململانێكانەوە نییە، بەر لە هەموو یاساو رێسا مرۆییەکان ئایینی ئیسلام قەدەغەی کردووە ، بۆیە ئەوەی لە پاریسی پاییەختی فەرەنسا روویدا، بەلای زۆرینەی هەرە زۆری مسوڵمانان لە سەراپای جیهان مەحکومە ، هەروەك پێشتریش لە رووداوگەلی لەو جۆرەدا ئەنجومەن و ناوەند و کۆڕو کۆمەڵە ئیسلامیەکان لە ئەوڕوپاو شوێنانی تردا بە توندی ئەو کارانەیان ئیدانە کردووەو خۆیان بە هاوسۆزو هاوخەمی قوربانیەکان زانیوە.
بە پلەی یەکەم مسوڵمانان زەرەرمەندی یەکەمن لەو رووداوانەو ئەوەش كە قازانج دەکات لە نێو خۆی وڵاتە ئەوڕوپییەکان راسیسزم و رەگەز پەرستە توندڕەوەکانن کە کێرڤیان بەرز دەبێتەوەو دژایەتیان بۆ کۆچبەران و بیانیەکان بە تایبەت بۆ مسوڵمانان زیاتر دەکەن وهەوڵ دەدەن هەستی ئیسلامۆفۆبیا لە نێو گەلەکانیاندا پەرە پێ بدەن. 
دەبێ ئەوەشمان لەبەر چاوبێ رووداوەکان ئاڵۆزوبەیەکەوەپەیوەستن ،چونکەئەو دۆزەخەی لەم ناوچەیە هەیە دەستی خۆرئاواو ئەوروپاشی تێدایە، هەروەك ئەوان دیموکراتی و مافی مرۆڤیان هەر بۆ خۆیان دەوێ و شەڕودۆزەخ و کوشتن و نەهامەتیش بۆ ئێمە ، ئەوەی لە پاریس روویدا رۆژانەو هەفتانە لەم ناوچەیەی ئێمەو خۆرهەڵاتی ناوەڕاستدا روودەدات، کەچی جگە لە ئیدانەکردنێك شتێکی تر نابینین و نابیستین، لە گەڵ ێەوەی ئەوان خاوەن دەسەڵات و موبادەرەن، کاتێك هێرش و پەلامارێك دژی خۆیان بێت دنیای بۆ ئەورووژێنن، بەڵام کاتێ مەسەلەکە پەیوەندی بە غەیری خۆیانەوە هەیە، ئەو جددییەت و حەماسەتە هەستی پێناکرێت،هەر وەك بینیمان لەتیرۆر کردنی سێ ژنە سەرکردەی کورد لە ناو جەرگەی پاریس ئایا هەڵوێستی فەرەنسا چی بوو و لێکۆلینەوەکان بەکوێ گەیشتن؟ پێویستە مرۆڤایەتی و مافی مرۆڤەکان بە یەکسان سەیر بکرێت و کۆمەڵگەی نێودەوڵەتی بە جددی بیر لە چارەسەری ریشەیی کێشەو قەیرانەکان بکاتەوە نەك بە ئینتیقائی..